«Элгис сүбэ» түмсүү бэйэ баҕа өттүнэн өрүү киртийбит сирдэри ыраастыыр, харыстыыр үтүө үгэстээх. Улууспутугар биллэриллибит үс ыйдаах ырааһырдыы чэрчитинэн кинилэр бүгүн Тандалыыр суол Сиэллээх Аартыгын ыраастаан, 13 куул бөҕү чөмөхтөөтүлэр. Кинилэри кытта Г.В. Егоров аатынан Мүрү 1-ҥы нүөмэрдээх орто оскуолатын 9 кылааһын үөрэнээччитэ Эрэл Алексеев бөх хомуйуутугар күүс-көмө буолбута хайҕаллаах суол. Түмсүү салайааччыта Александра Черкашина хомуйуллубут бөҕү тиэйэргэ техникалара суох буолан, дойдутун дьонун Тиит Арыы ватсап бөлөҕөр көмөҕө ыҥыран суруйбутун, тутатына Тиит Арыы уолаттара Леонид Саввин массыынатыгар тиэйэн, хомуйуллубут бөҕү свалкаҕа илдьэн тохтулар. Айылҕаны ис сүрэхтэн харыстааһын уонна маннык баҕа өттүнэн үтүө дьыаланы оҥорор быһыы-майгы — барыбытыгар холобур буолар. Түмүккэ «Элгис сүбэ» түмсүү улуус олохтоохторугар ыҥырыытын эһиги болҕомтоҕутугар таһаарабыт!
Убаастабыллаах суоппардар, айанньыттар !
Ханна да сырыттаргыт Айан Аартыктарын бөҕүнэн толорумуоҕуҥ, сиэри-туому тутуһа сылдьыаҕыҥ. Ытык сирдэрбитин харыстыаҕыҥ, бары ыраастыы, көрө-истэ, сүгүрүйэ-махтана сылдьыаҕыҥ.
Улуус дьаһалтатын пресс-сулууспата.
