“Киһи – айылҕа оҕото” диэн бэргэн этиини бары даҕаны кыра сааспытыттан истэн-билэн кэллэхпит. Онон тулалыыр айылҕабыт чөл туруктаах, тыабыт күөх суугуна быйаҥнаах сирин аһынан, көтөрүнэн-сүүрэринэн, балыгынан күндүлээтэҕинэ доруобай көлүөнэ үүнэ-сайдара чахчы. Ол эрээри кэлиҥҥи кэмҥэ айылҕаҕа, тулалыыр эйгэҕэ харыстабыла суох кирдээх сыһыан баара мэлдьэх буолбатах. Онон үүнэр көлүөнэ ыччаппыт кыра сааһыттан айылҕаҕа сыһыана ураты харыстабыллаах буолуутугар бүттүүн түмсүүлээх үлэтэ бу күнтэн ыла “Айылҕа ситимэ” диэн улуустааҕы экология киинэ бүгүн улуустааҕы киин библиотекаҕа тэриллибит үөрүүлээх арыллыытыттан саҕаланнаҕа буолуохтун. Маннык биир ситимнээх дьаһал СӨ Ил Дарханын, улуус баһылыгын анал уураахтарынан улуустар киин библиотекаларын нөҥүө тэриллэн, онно сүрүннэнэн ыытыллыаҕа. Бу үөрүүлээх күн улуус баһылыгын солбуйааччы Григорий Аргунов эҕэрдэтинэн арылынна. Улуустааҕы экология салаатын салайар Семен Васильев бэлиэтииринэн, 14 киһилээх анал хамыыһыйа сүрүннээһининэн экология харыстабылыгар уопсастыбаннаһы кытта үлэ, кинилэри экология өттүгэр үөрэхтээһин тэриллэрин туһунан иһитиннэрдэ. Быйыл 19 анал тэрээһин ыытыллара былааннаммытын, ол курдук ырааһырдыы үлэлэрэ, экологияҕа сыһыаннаах бэлиэ күннэри тэрийии, хаартысканан куонкурустар, араас акциялар, хамсааһыннар, о.д.а. Экология анал киинин арылыытыгар улуустааҕы эдэр натуралистар станцияларын педагогтара, ойуур хаһаайыстыбатын улуустааҕы тэрилтэтин салайааччытын солбуйааччы Николай До, улуустааҕы кииннэммит библиотека дириэктэрэ Лена Павлова, “Элгис” түмсүү көҕүлээччитэ Александра Черкашина ыытар үлэлэрин хайысхатын билиһиннэрдилэр, тус санааларын үллэһиннилэр, бииргэ үлэлэһиигэ түмсүү күүһүгэр эрэнэллэрин биллэрдилэр. Кииннэммит библиотека электроннай ситими үлэлэтэр киин исписэлииһэ Тамара Орлова саҥа электроннай экологическай саайт арыллыбытын билиһиннэрэн сырдатта. Анал саайт нөҥүө мантан ыла улууспут экологиятын туһугар кыһаллааччылар, хамсааһыны таһаарааччылар, олохтооччулар үтүө сонуннарыттан саҥа хамсааһыннары билсэн, онно бүттүүн кыттыһан, дойдубут Аар айылҕата чэлгийэ турарын туһугар тус кылааппытын киллэрэргэ турунуохпут турдаҕа.
Светлана Сивцева
📹Мария Аргунова ✅ @uamurusahargata @ulusmedia
